Sarien aurkezpenean ere Kunkanak egin du bere lekua
Geu ere herriko lasterketa kuttunaren zale gara. Mendi lasterketa, azken hamarkadan, ihauteriekin batera negu ilunetik udaberrira igarotzeko zita garrantzitsuena bilakatu zaigu. Herrian eta mendian jendetza bildu ohi gara, korrikalari zein animatzaile, egunaz gozatzeko. Gure lasterketa hain berezi eta kuttun egiten duen adierazle nabarmenena boluntario andana da inongo zalantzarik gabe.
Kunkana, herrigintzatik sorturiko ekimena da ere eta guztiz identifikatzen da lasterketaren balio eta helburuekin. Horregatik geure aletxoa jarri nahi dugu aurten hasi eta aurrerantzean ere: Boluntarioari saria!
Urtero musutruk lanerako prest dauden boluntarioen artean inguruko eta garaiko produktuen saski eder pare bat zozketatuko ditugu. Anima zaitezte aurten ere egun eder honetan parte hartzera!